दिनमा उनी भारत उत्तर प्रदेशको नोएडास्थित एक निजी कम्पनीमा एचआर डिपार्टमेन्टमा काम गर्थे । राति भने आफूलाई अमेरिकाको मोडेल भएको झुटो परिचय र आश्वासन देखाएर साइबर अपराध गर्थे । उनको दिनको जागिरले उनलाई सुरक्षा दिन्थ्यो । तर उनको रातको गतिविधि महिलाहरूलाई ब्ल्याकमेल गरेर पैसा कमाउने माध्यम बन्यो ।
ती व्यक्ति हुन्, २३ वर्षीय तुषारसिंह विष्ट । उनीमाथि डेटिङ एप र सामाजिक सञ्जालमार्फत ७०० भन्दा बढी महिलालाई ठगी गरेको आरोप लागेको छ । हालै पूर्वी दिल्लीको शकरपुर क्षेत्रबाट उनलाई प्रहरीले नियन्त्रणमा लिएको छ ।
भारतीय मिडिया एनडीटीभीका अनुसार तुषार दिल्लीका बासिन्दा हुन् र उनले व्यवसाय व्यवस्थापन (बीबीए) मा स्नातक गरेका छन् । उनी विगत तीन वर्षदेखि नोएडाको एक निजी कम्पनीमा टेक्निकल रिक्रुटरको रूपमा काम गर्दै आएका छन् । तीन वर्षदेखि टेक्निकल रिक्रुटरको रूपमा काम गर्दै आएका तुषार, लोभ र महिलाप्रतिको मोहका कारण साइबर अपराधको जालोमा फसेका हुन् ।
ब्ल्याकमेल गर्ने उनको तरिका
तुषारले सबैभन्दा पहिले एउटा एपको मद्दतले भर्चुअल अन्तर्राष्ट्रिय मोबाइल नम्बर लिए, अनि बम्बल र स्न्यापच्याटजस्ता डेटिङ तथा सामाजिक सञ्जालमा नक्कली प्रोफाइल बनाए । उनले आफूलाई एक अमेरिकी स्वतन्त्र मोडेल भएको र भारत भ्रमणमा रहेको झुटो कथा बुने । उक्त प्रोफाइलका लागि उनले ब्राजिलका एक वास्तविक मोडेलका फोटो र कथा चोरे ।
उनका मुख्य निशानामा १८ देखि ३० वर्ष उमेरका महिला थिए । उनीसँगै अनलाइन प्लेटफर्महरूमा कुरा गर्दै जाँदा महिलाले आफ्ना नम्बर तथा गोप्य तस्वीरहरू पठाउँथे । सुरुवातमा उनले यी क्रियाकलापलाई मनोरञ्जनका रूपमा सुरु गरे तर समयसँगै उनले यसलाई ब्ल्याकमेल र पैसा असुल्ने व्यवस्थित योजनामा बदलिदिए ।
प्रहरीका अनुसार तुषारले ती गोप्य सामग्रीको प्रयोग गरेर महिलालाई धम्की दिने गर्थे । यदि महिलाले पैसा दिन अस्वीकार गरे भने उनी ती सामग्री इन्टरनेटमा वा डार्क वेबमा बेच्ने धम्की दिन्थे ।
को को भए पीडित ?
तुषारले बम्बलमा ५०० भन्दा बढी महिलासँग र स्न्यापच्याट तथा ह्वाट्सएपमा २०० भन्दा बढी महिलासँग संवाद गरेको प्रहरीको प्रारम्भिक अनुसन्धानले देखाएको छ । उनले थुप्रै महिलाका गोप्य सामग्रीहरू जम्मा गरेका थिए ।
त्यस्तै एक पीडितले साइबर पुलिस स्टेसनमा १३ डिसेम्बर २०२४ मा उजुरी दिएकी थिइन् । दिल्ली विश्वविद्यालयमा अध्ययनरत दोस्रो वर्षकी छात्राको यो घटना २०२४ को जनवरीमा सुरु भएको थियो । ती युवतीले बम्बलमा तुषारसँग कुरा गर्न सुरु गरेपछि उनीमाथि यस्तो घटना निम्तिएको थियो ।
तुषारले आफूलाई अमेरिकी मोडेल भएको बताउँदै दोस्ती सुरु गरे । उनले ती छात्रालाई व्यक्तिगत तस्वीर र भिडियो पठाउन लगाएर पछि ब्ल्याकमेल गर्न थाले । सुरुमा छात्राले दबाबमा परेर थोरै रकम तिरिन् तर पछि बढी रकम माग्न थालेपछि उनले परिवारलाई जानकारी गराइन् र प्रहरीमा उजुरी दिइन् ।
एनडीटीभीका अनुसार पश्चिम दिल्लीको साइबर पुलिस स्टेसनले एसीपी अरविन्द यादवको नेतृत्वमा एउटा टोली गठन गरेिएको थियो । प्रविधिको सहायताले तुषारको गतिविधि पत्ता लगाइयो । पछि शकरपुरमा छापामार अभियान चलाएर उनलाई नियन्त्रणमा लिइयो ।
पक्राउको क्रममा प्रहरीले तुषारको मोबाइल फोन, नक्कली अन्तर्राष्ट्रिय मोबाइल नम्बर, १३ ओटा विभिन्न बैंकका क्रेडिट कार्ड र ६० भन्दा बढी महिलासँगका ह्वाट्एसप च्याट रेकर्ड बरामद गरेको छ । प्रारम्भिक अनुसन्धानका क्रममा चार महिला पनि तुषारको ठगीको शिकार भएको पुष्टि भएको छ । बाँकी अनुसन्धान अगाडि बढिरहेको प्रहरीले जनाएको छ ।