दिनेश कार्थिक र ग्लेन म्याक्सवेलको अर्धशतकप्रेरित रोयल च्यालेन्जर्स बैंगलोरले शनिबार राति इन्डियन प्रिमियर लिग (आईपीएल)मा दिल्ली क्यापिटल्सलाई १६ रनले हराएको छ । मुम्बईको वाङ्खेडे रंगशालामा टस हारेर ब्याटिङका लागि निम्त्याइएको बैंगलोरले निर्धारित २० ओभरमा ५ विकेट गुमाएर १८९ रन बनाएको थियो । १९० रनको लक्ष्य पछ्याएको दिल्लीले ७ विकेट गुमाएर १७३ रन मात्र बनाउन सक्यो । बंगलोरको यो चौथो जित हो । ६ मध्ये ४ खेल जितेको बैंगलोर ८ अंकका साथ तेस्रो स्थानमा छ । समान आठ अंक जोडेको गुजरात टाइटन्स शीर्ष र लखनउ सुपर जायन्ट दोस्रो स्थानमा छ । पाँचमध्ये दुई खेल जितेको दिल्ली चार अंकका साथ आठौं स्थानमा छ ।
बैंगलोरले पहिलो तीन विकेट सुरुमै गुमाएको थियो । अनुज रावत शून्य, फाफ डुप्लेसिस ८ र विराट कोहली १२ रन बनाएर पवेलियन फर्किएका थिए । म्याक्सवेलले केहलीसँग तेस्रो विकेटका लागि २७ रनको साझेदारी गरे भने सुयश प्रभुदेसाईसँग चौथो विकेटका लागि ३५ रनको साझेदारी गरे । ३४ बलमा सात चौका र दुई छक्कासहित ५५ रन बनाएका म्याक्सवेलले शाहबाज अहमदसँग पाँचौं विकेटका लागि १७ रनको साझेदारी गरे । ११.२ ओभरमा म्याक्सवेल पवेलियन फर्किएपछि दिनेश कार्थिक र अहमदले छैटौं विकेटका लागि ९७ रनको अविजित साझेदारी गरेपछि बैंगलोर सम्मानजन स्कोर बनाउन सफल भएको थियो ।
कार्थिकले ३४ बलमा ५ चौका र ५ छक्कासहित अविजित ६६ रन बनाए भने अहमदले २१ बलमा ३ चौका र एक छक्कासहित अविजित ३२ रन बनाए । दिल्लीका शार्दुल ठाकुर, खालीद अहमद, अक्सर पटेल र कुलदीप यादवले एक एक विकेट लिए । १९० रनको लक्ष्य पछ्याएको दिल्लीका लागि डेविड वार्नरले सबैभन्दा धेरै ६६ रन बनाए । कप्तान रिशब पन्तले ३४ रन बनाए । ठाकुरले १७ रन बनाए भने पृथ्वी शाले १६ र मिचेल मार्शले १४ रन बनाए । अक्सर पटेल र कुलदीप यादव समान १० रनमा अविजित रहे । बैंगलोरका जोश हाज्लेउडले तीन र मोहम्मद सिराजले दुई विकेट लिए । वानिन्दु हसरंगा डी सिल्भाले एक विकेट लिए बनाए ।