७ कात्तकि, काठमाडौं । भारतलाई ३-१ ले पराजित गर्दै साविक विजेता बंगलादेश साफ वुमन्स च्याम्पियन्सिप २०२४ को सेमिफाइनलमा प्रवेश गरेको छ ।
पहिलो खेलमा पाकिस्तानसँग बराबरी खेलेको बंगलादेशले बुधबार भारतमाथि शानदार जित निकाल्दै समूह ए को विजेता बनेको हो ।
भारतलाई समूह विजेता बन्दै सेमिफाइनल जान बराबरी नै पर्याप्त थियो । बंगलादेशलाई सेमिफाइनल पुग्नका लागि मात्र त बराबरीले नै पुग्थ्यो । जितपछि बंगलादेश समूह ए मा ४ अंक जोडेर विजेता बन्यो ।
यसअघि नै सेमिफाइनलमा स्थान पक्का गरिसकेको भारत एक जित र एक हारको नतिजापछि उपविजेता बन्यो । एक बराबरी र एक हारको नतिजा निकालेको पाकिस्तान १ अंकसहित समूहको अन्तिममा रहँदै बाहिरियो ।
त्रिपुरेश्वरस्थित दशरथ रंगशालमा तोहुरा खातुनले दुई गोल गरेपछि बंगलादेशले भारतविरुद्ध साफ वुमन्स च्याम्पियनसिपमा लगातार दोस्रो पटक जित हात पारेको हो ।
सन् २०२२ मा काठमाडौंमै भएको पछिल्लो साफ च्याम्पियनसिपमा बंगलादेशले भारतलाई समूह चरणमै ३-० ले पराजित गरेको थियो । त्यही साफमा भारत सेमिफाइनलमा नेपालसँग १-० ले पराजित हुँदै पहिलो पटक फाइनल पुग्न असफल भएको थियो । साफमा भारत पराजित भएको यो तेस्रो पटक हो ।
पहिलो खेलमा अन्तिम समयमा गोल गर्दै पाकिस्तान विरुद्ध हार टारेको बंगलादेशले भारत विरुद्ध भने सुरुवातदेखि नै राम्रो प्रदर्शन गर्यो ।
खेलको १९औं मिनेटमा अफेइदा खान्डाकेरले गोल गर्दै बंगलादेशलाई अग्रता दिलाएकी थिइन् । त्यसपछि तोहुरा खातुनले २९औं मिनेटमा गोल गरी अग्रता दोब्बर पारिन् ।
तोहुराले नै ४२औं मिनेटमा गोल गरेपछि बंगलादेशले पहिलो हाफमै ३-० को अग्रता लियो । त्यसको अर्को मिनेटमै भारतका लागि बालादेवीले गोल गर्दै गोल अन्तर घटाइन् ।
दोस्रो हाफमा पनि भारतले गोल फर्काउने प्रयास गरेको थियो । तर सफल हुन सकेन । दोस्रो हाफमा दुवै टोलीले गोल गर्ने केही अवसर बनाएपनि सदुपयोग गर्न सकेन ।
च्याम्पियनसिप अन्तर्गत बिहीबार समूह चरणका अन्तिम दुई खेल हुनेछ । समूह बी अन्तर्गत भुटान र माल्दिभ्सबीच दिउँसो साढे १ बजे खेल सुरु हुनेछ भने घरेलु टोली नेपालले साढे ५ बजे हुने खेलमा श्रीलंकासँग खेल्नेछ ।
घरेलु टोली नेपाल र भुटानको समान ४ अंक छ भने श्रीलंकाको ३ अंक छ । दुई हारपछि अंकविहिन माल्दिभ्स समूह्य चरणबाटै बाहिरिसकेको छ । अन्तिम खेलमा हार टारे नेपाल र भुटान सेमिफाइनल पुग्नेछ । श्रीलंकाका लागि भने सेमिफाइनल पुग्न नेपाललाई हराउनुपर्नेछ ।