१२ मंसिर, काठमाडौं। बार्सिलोनाले मंगलबार राति च्याम्पिन्स लिगमा फ्रेन्च क्लब ब्रेस्टमाथि सानदार जित निकाल्दा २ गोल लेवान्डोस्कीको नाममा रह्यो ।
खेलको १०औं मिनेटमा मिडफिल्डर पेड्रीले डी–बक्सभित्र दिएको पासमा ब्रेस्टका गोलरक्षकले लेवान्डोस्कीलाई लडाएपछि बार्सिलोनाले पेनाल्टी पाएको थियो । पेनाल्टीमा सुन्दर फिनिसिङ गर्दै लेवान्डोस्कीले च्याम्पियन्स लिगमा १०० गोलको आँकडा पूरा गरे ।
९ नम्बर जर्र्सी दर्शक सामु देखाउँदै लेवान्डोस्कीले १००औं गोलको सेलिब्रेसन गरे । दोस्रो हाफमा बार्सिलोनाले थप २ गोल गर्दा लेवान्डोस्कीकै नाममा अर्को एक गोल रह्यो । ६६औं मिनेटमा डानी ओल्मोले गोल गरे ।
९० मिनेटपछिको अतिरिक्त समयमा बाल्डेको पासमा लेवान्डोस्कीले गोल गरेपछि गोलको आँकडा १०१ पुर्याए । योसँगै च्याम्पिन्स लिगमा सय गोलको आँकडा पूरा गर्ने उनी तेस्रो खेलाडी बनेका छन् । उनी भन्दा अघि रोनाल्डो र मेसीले सय गोलको आँकडा पुरा गरेका छन् ।
लयमा लेवान्डोस्की
पोलिस फरवार्ड रोबर्ट लेवान्डोस्की यो सिजन उच्च लयमा छन् । जारी च्याम्पियन्स लिगमा ५ खेलबाट ७ गोल गर्दै उनी बढी गोल गर्नेको पहिलो सूचीमा छन् ।
यसअघि सर्बियन क्लब रेड स्टार बेलग्रेडमाथि ५–२ को जित निकाल्दा लेवान्डोस्कीले २ गोल गरेका थिए । त्यस्तै बायर्नविरुद्ध १ र योङ ब्वाइविरुद्ध २ गोल गरेका थिए ।
च्याम्पियन्स लिगमा १०० गोलको आँकडा पूरा गरेका लेवान्डोस्कीको गोल अनुपात भने मेसी र रोनाल्डोको भन्दा राम्रो छ ।
रोनाल्डोले च्याम्पियन्स लिगको १८३ खेलमा १४० गोल गरेका छन् भने मेसीले १६३ खेल खेल्दै १२९ गोल गरेका छन् । तर १२५ खेल खेलेका लेवान्डोस्कीले १०१ गोल गरेका छन् । रोनाल्डोको खेलअनुसार गोलको अनुपात ०.७७, मेसीको ०.७९ र लेवान्डोस्कीको ०.८१ छ ।
उनले १०० गोलका लागि १० हजार ५४१ मिनेट मैदानमा बिताएका छन् । जसअनुसार १०५ मिनेट २५ सेकन्डमा १ गोलका दरले लेवान्डोस्कीले गोल गरेका छन् । च्याम्पियन्स लिगमा तीन फरक क्लबबाट ह्याट्रिक गर्ने उनी पहिलो पोलिस खेलाडी पनि हुन् ।
उनले सन् २०२२/२३ मा बार्सिलोनाबाट खेल्दै भिक्टोरिया पेन्जविरुद्ध ह्याट्रिक गरेका थिए । यसअघि च्याम्पियन्स लिगमा डर्टमन्ड र बार्यनबाट पनि उनले ह्याट्रिक गरेका थिए । बार्यनमा रहँदा उनले बेनफिकाविरुद्ध ह्याट्रिक गरेका थिए ।
सन् २०११ बाट जर्मन क्लब बोरुसिया डर्टमण्डबाट च्याम्पियन्स लिगमा डेब्यू गरेका लेवान्डोस्कीले त्यसै क्लबबाट २८ खेल खेल्दै १७ गोल गरेका थिए । त्यसपछि बायर्न म्युनिख आएका लेवान्डोस्कीले ७८ खेल खेल्दै ६९ गोल गरे । बायर्नबाट बार्सिलोनामा आएका उनले १९ च्याम्पियन्स लिग खेल खेल्दै १५ गोल गरेका छन् ।
कुन क्लबविरुद्ध कति गोल ?
लेवान्डोस्कीबाट सबैभन्दा बढी गोल खाने क्लब बेनफिका र क्रभिना भेज्टा हुन् । यी दुबै क्लबविरुद्ध उनले सामान ७-७ गोल गरेका छन् । बेनफिकाविरुद्ध ४ खेलमा उनले ७ गोल गरेका थिए भने क्रभिना भेज्टाविरुद्ध भने ३ खेलमै ७ गोल गरेका थिए ।
त्यसपछि ला–लिगा क्लब रियल मड्रिड र साल्जबर्गविरुद्ध उनले समान ६/६ गोल गरेका छन् । सिजन २०१२/१३ मा च्याम्पियन्स लिगको सेमिफाइनलमा रियल मड्रिडलाई हराउने क्रममा लेवान्डोस्कीले ४ गोल गरेका थिए । च्याम्पियन्स लिगको सेमिफाइनलमा कुनै एक खेलाडीले गरेको ४ गोल यो मात्रै हो । पहिलो लेगमा २–० ले हारेको डर्टमन्डले दोस्रो लेगमा ४–१ को जित निकालेको थियो ।
डच क्लब आयाक्स, डिनामो, ओलम्पिकासविरुद्ध समान ५/५ गोल गरेका छन् । इंग्लिस क्लब आर्सनल र अहिले उनको क्लब बार्सिलोनाविरुद्ध समान ४/४ गोल गरेका छन् ।
एथेन्स, चेल्सी, डाइनामो किभ, मार्सेली, पीएसभी, भिक्टोरिया प्लानेज विरुद्ध समान ३ गोल गरेका छन् । शाख्तर डोनेस्क, जेन्थ, एथ्लेटिको मड्रिड, एन्डरलेच्ट, बेसिक्टास, नापोली, लाजिओ, टोटनहाम, योङ ब्वाई, इन्टर र ब्रेस्टविरुद्ध समान २/२ गोल लेवान्डोस्कीले गरेका छन् ।
त्यसैगरी मालागा, रोमा, म्यानचेस्टर सिटी, युभेन्टस, पीएसजी, लियोन, एन्टवर्प, भिल्लारियल र बायर्नविरुद्ध समान १/१ गोल गरी च्याम्पियन्स लिगमा लेवान्डोस्कीले १०१ गोल गरेका छन् ।
च्याम्पियन्स लिगमा लेवान्डोस्कीको गोल समयलाई हेर्ने हो भने सबैभन्दा खतरनाक उनी ७६–९० मिनेटको समयमा देखिन्छ । यो बीचमा उनले सबैभन्दा बढी २० गोल गरेका छन् ।
खेल सुरुवातदेखि १५ मिनेटको समयमा उनले १४ गोल गरेका छन् । १६ देखि ३० मिनेटको समयमा उनको गोल स्कोर १५ छ । ३१ देखि ४५ को बिचमा १७ र ४६ देखि ६० को बिचमा पनि १७ गोल गरेका छन् । ६१ देखि ७५ मिनेटको समयको अवधिमा भने उनले १८ गोल गरेका छन् ।
च्याम्पियन्स लिगमा गु्रप स्टेजका ७७ खेल खेलेका उनले यो अवधिमा ६९ गोल गरेका छन् । नकआउट चरणमा ४८ खेल खेलका उनले ३२ गोल गरेका छन् । नकआउट चरणमा भन्दा ग्रुप चरणमा उनको गोल अनुपात राम्रो छ ।
उनले पेनाल्टी एरियाबाट ६९ गोल गरेका छन् भने गोल एरियाबाट २८ गोल गरेका छन् । आउट साइड पेनाल्टी एरियाबाट उनले ४ गोल गरेका छन् ।
दायाँ खुट्टाले ६५ गोल गरेका लेवान्डोस्कीले बाँया खुट्टाले जम्मा १६ गोल गरेका छ् । २० गोल हेडमार्फत गरेका छन् ।