त्रिभूवन विश्वविद्यालयबाट पत्रकारिता तथा आमसंचार विषयमा स्नातकोत्तर गरेका मदनमणि अधिकारी यतिखेर सिड्नीको ग्लेन्डेनिङमा बस्दछन्। सन् २०१४ मा अन्तर्राष्ट्रिय विद्यार्थीका रूपमा अष्ट्रेलिया आउनु अघि अन्नपूर्ण पोष्ट दैनिकको शनिबारिय परिशिष्ट ‘फूर्सद’को संयोजन साथै नागरिक उड्डयन तथा प्रविधि बिटमा रिपोर्टिङ गर्ने उनले विभिन्न कलेजहरूमा स्नातक तहमा अध्यापन समेत गर्दथे।
अनलाईन मिडिया साथै भिजुअल संचारमा लामै समय बिताएका उनले अष्ट्रेलियामा समेत प्रविधी र संचारको क्षेत्रमा काम गरिरहेका छन्। अष्ट्रेलियामा सफ्टवेयर ईंजिनियरिंग र प्रोजेक्ट म्यानेजमेन्टका क्षेत्रमा अध्ययन गरेका उनी समुदायमा भने ‘ईन्टरप्रेटर’ (अंग्रेजी नेपाली दोभाषे) साथै ‘नाटी सिसिएल’ (माईग्रेसनको लागी ५ प्वाईन्ट बढाउने दोभाषे सिप परिक्षा) तयारी कक्षाका लागी चिनिन्छन्। त्यसो त अष्ट्रेलिया आउने नेपाली विद्यार्थीहरूलाई मेन्टरको सेवा समेत दिने उनी विद्यार्थीका पक्षमा खरो र निडर रूपमा अडान लिनसक्ने व्यक्तिका रूपमा उनलाई लिने गरिन्छ। समस्या सुनाउन आउने विद्यार्थीहरूको अवस्था देखेर उनीहरूलाई सचेत र जागरूक बनाउनु आफ्नो कर्तव्य भएकाले विद्यार्थीहरूलाई ‘प्रतिक्रियात्मक’ भन्दा पनि ‘स्वक्रियात्मक’ बन्न उनले सिकाउँदै आएका छन्।
साथीसंगत साथै आधुनिक देखिने नाममा अष्ट्रेलिया करिअर र भविष्य बनाउन आएका धेरै विद्यार्थी कसैको व्यवसाय मात्र बनिरहेको अवस्थाले उनी चिन्तित छन्। अष्ट्रेलिया अवसरको खानी भएपनि त्यसबाट फाईदा लिनको लागी भने आफूसँग उपयुक्त शीप, शैली हुनुपर्छ र साथीसंगतले पनि धेरै ठूलो भूमिका खेल्छ, त्यसैले आफ्नो अवस्था र गन्तव्यको आंकलन गरेर अघि बढ्नुपर्छ।
‘आफ्नो सर नपर्दा सम्म कोरीको पनि पाउ मोल्नु’ नेपाली समाजमा अक्सर उच्चारण गरिने भनाईलाई नै संघर्ष र सफलताको घोषका रूपमा लिएका उनी भन्छन्, अष्ट्रेलियामा गरिने संघर्ष सिड्नीको समुन्द्रमा डुबे जस्तै हो, डुबेपछी मोती नटिपी फर्कनु हुँदैन।’ अष्ट्रेलिया आउँदा राखेका महत्वपूर्ण दुई लक्ष समयमा नै पुरा भएको र तेस्रो लक्ष तर्फ अघि बढिरहेको बताउने मदनमणि भन्छन्, ‘अष्ट्रेलियामा पीआर र घरलाई मात्र सफलताको मानक बनाउनु हुँदैन। अनुसाशितरूपमा अघि बढ्ने हो भने यी सहजै हासिल हुने कुरा हुन्।’ आगामी दिनमा विद्यार्थी साथै अष्ट्रेलियामा घरबास बसाउन चाहनेहरूलाई सहयोगी हुने गरेर व्यवसायिक रूपमा सार्वजनिक हुने योजनामा छन्।