नेपालको सर्वाधिक चर्चित फ्रेन्चाइज क्रिकेट प्रतियोगिता एभरेष्ट प्रिमियर लिग क्रिकेट (ईपीएल) आजदेखि शुरुहुँदै छ । २१ गतेसम्म चल्ने प्रतियोगितामा देशका विभिन्न ६ वटा सहरको नाममा टिम बनाइएको छ । काठमाडौं किंग्स इलाभने ११, ललितपुर प्याट्रियोट्स, भैरहवा ग्लाडियटर्स, पोखरा राइनोज, चितवन टाइगर्स र विराटनगर वारियर्सले सहभागीता जनाउँदैछन् । सबै टिमले तयारी पनि पुरा गरेका छन् ।
१०८ जना खेलाडी यी ६ टिममा सहभागी छन् । ६ टिमले नै चार चार जनाका दरले २४ जना विदेशी खेलाडी अनुबन्ध गरेका छन् । प्रतियोगिताको उपाधि विजेताले ५० लाख प्राप्त गर्दा उप विजेता हुने टिमले १५ लाख प्राप्त गर्ने छ । प्रतियोगिता अन्तर्गत उद्घाटन खेलमा शनिबार काठमाडौं किंग्स इलाभेन र ललितपुर प्याट्रियोट्स आमने सामने हुने छन् । काठमाडौं सन्दीप लामिछानेको कप्तानीमा रहेको छ भने ललितपुरको कप्तानी युवा खेलाडी कुशल भुर्तेलले गर्नेछन् ।
ललितपुरका कप्तान रहेका नेपाली टिमका कप्तान समेत रहेका ज्ञानेन्द्र मल्लले अन्तिम समयमा प्रतियोगिता नखेल्ने घोषणा गरेपछि भुर्तेलले कप्तानी सम्हाल्न लागेका हुन् । प्रतियोगिताका लागि काठमाडौंमा अनुबन्ध भएका पाकिस्तानी पूर्व कप्तान शाहिद अफ्रिदी आएका छन् । उनले काठमाडौंबाट शुरुका दुई वटा मात्रै खेल खेल्ने छन् ।