इङ्ग्ल्यान्ड युरो कप २०२० को सेमिफाइनलमा प्रवेश गरेको छ । शनिबार राति भएको अन्तिम क्वार्टरफाइनल खेलमा युक्रेनमाथि ४–० गोलको शानदार जित निकाल्दै इङ्ग्ल्यान्ड अन्तिम चारमा पुगेको हो ।
इटालीमा भएको खेलमा इङ्ग्ल्यान्डलाई जिताउन कप्तान ह्यारी केनले दुई गोल गर्दा ह्यारी मग्वाएर र जोर्डन हेन्डरसनले समान एक गोल गरे ।
खेलको चौथो मिनेटमा कप्तान केनले गोल गर्दै इङ्ग्ल्यान्डलाई सुरुआती अग्रता दिलाएका थिए । ४६औँ मिनेटमा मग्वाएरले गोल गर्दै इङ्ग्ल्यान्डको अग्रता दोब्बर बनाए ।
खेलको ५०औँ मिनेटमा केनले व्यक्तिगत दोस्रो गोल गर्दै इङ्ग्ल्यान्डलाई ३–० गोलको अग्रता दिलाए भने ६३औँ मिनेटमा हेन्डरसनले गोल गर्दै इङ्ग्ल्यान्डलाई ४–० को शानदार जित दिलाए ।
जितसँगै इङ्ग्ल्यान्ड २५ वर्षपछि युरो कपको सेमिफाइनलमा प्रवेश गरेको छ । यसअघि ऊ सन् १९९६ मा सेमिफाइनल पुगेको थियो ।
अब इङ्ग्ल्यान्डले सेमिफाइनलमा डेनमार्कसँग खेल्नेछ । गए राति भएको अर्को खेलमा चेक रिपब्लिकलाई २–१ गोल अन्तरले पराजित गर्दै डेनमार्कले अन्तिम चारमा प्रवेश गरेको छ ।